عندي ليك صديقي واحد التمرين ديرو باش تستوعب حجم الكارثة و الدمار اللي وصل ليه المجتمع المغربي، و خطورة زواج المحكمة اللي تانحذروك منو و علاش تانصحوك لا للزواج … هاد التمرين غايكون mind blowing بالنسبة ليك.
– دخل ل Google Maps و شوف أقرب محكمة أسرة أو محكمة ابتدائية فيها قسم قضاء الأسرة … محكمة الأسرة إما تاتكون بوحديها أو دايرينها مع المحكمة الابتدائية فنفس ال building.
– سير لهاد المحكمة نهار الثلاثاء او الأربعاء فالصباح (ماتمشيش الإثنين و الجمعة) و هز فيديك شي ملف فيه شي وراق كيفما كانو، و طلق عينيك مزيان فالباركينغ و شوف النساء كبارات و بنات صغار و رجال كولشي جاي باش يطلق.
– دخل للمحكمة، لا وقفك البوليسي فالباب قوليه عندي جلسة ديال الشقاق فالقاعة 2، لا قاليك عطيني الإستدعاء قوليه بقا عند المحامي ديالي، لا قاليك عيط على المحامي قوليه راه عندو جلسة وساطة و هو اللي قاليا ندخل للمحكمة راه تايتسناني لداخل دابا باش نعطيه مرفقات الملف، البوليسي غادي يشوفك هاز وراق و يخليك تدخل … وسط المحكمة شوف المحامون و العيالات اللي جايات يجرجرو رجالهم .. سول كذلك على صندوق المحكمة و شد النوبة و طلق عينيك شوف الرجال تايخلصو الأموال الطائلة بسبب أنهم تزوجو … فاش توصل نوبتك فالصندوق دير راسك نسيتي لاكارط ناسيونال و خرج فحالك.
– غالبا المحكمة فيها شي 4 قاعات أو أكثر … قلب على القاعة اللي فيها الناس كثار، تايعني أنها جلسة علنية، دخل ليها و جلس اللور و دير سيلونسيو للتيليفون و طلق عينيك فرئيس الجلسة و كاتب الضبط و العون و شوف شحال من ضوسي وردي غادي يدوز فديك الجلسة … كل ضوسي بطلاق … شوف المحامون و هوما تايحطو المقالات … شوف الزوجات و هوما تايحسبو شحال غاتخرج ليهم فالنفقة … شوف الرجال وجهم بئيس و عبوس جاو يواجهو المصير المحتوم ديالهم … شوف الدراري الصغار جارينهم ماواتهم المطلقات باش يأثرو على القاضي و يخرج ليهم نففة كبيرة.
– عاود خرج لوسط المحكمة و شوف شي مجمع ديال العيالات سير وقف حداه … دير راسك ساهي تاتقلب فالتيليفون و طلق ودنيك فالهضرة اللي تايقولو، غادي تصدم.
– إذا كان عندك الوقت متوفر، كرر هاد التمرين شي 4 مرات و بدل الأيام (من الأحسن سير الثلاثاء و الأربعاء و الخميس) باش ماطيحش فنفس الناس و فنفس الرؤساء و فنفس الجلسات، حيت كل ملف ديال الطلاق عندو نهار ديالو ماتايتبدلش، نتا اللي خاصك تبدل النهار باش ماتعاودش تحضر لنفس الملف.
أظن من بعد فاش غاتسالي هاد التمرين، غادي تجي تبوس للأدمين راسو على هاد الصفحة.
